Merkilegir hlutir gerast enn...

Já...það gerðist heldur betur merkilegur hlutur í dag.

Svo merkilegur að ég mátti til með að skrifa það hér niður og deila því með ykkur lesendum mínum.

Veit nú ekki hve merkilegur hann er á skalanum 1-10, læt ykkur eftir að dæma um það.

En alla vega þá var ég að vinna í dag á geðdeildinni og eins og oft í samræðum við fólk sem maður þekkir ekki vel leiddist talið m.a. að aldri þeirra sem þátttakendur voru í einu af þeim samtölum sem fram fóru milli okkar sem eyddum þessum fína degi saman. Ég segi satt og rétt frá því að ég sé 23 ára og hvað haldið þið að einn sjúklingurinn segi? "Bara 23 ára...en þú ert svo fullorðinsleg"

Já, merkilegt nokk í fyrsta skiptið á minni ævi, held ég að ég megi barasta fullyrða, heldur einhver að ég sé eldri en ég er! Og það var bara mjög skemmtileg tilbreyting þar sem það getur verið þreytandi til lengdar að heyra að ég sé svo ungleg. Sérstaklega þegar maður er í 4 ára háskólanámi og ætlar sér jafnvel að fara að vinna í starfi þar sem fólk þarf oft að treysta manni fyrir lífi sínu...hugsa að sumir séu tortryggnir á það við fyrstu sýn að unglamb eins og ég geti höndlað það, þó að ég hugsi nú að þegar það kynnist mér þá breytist sú skoðun - ekki skal dæma bókina eftir kápunni ;) Ég get nú ímyndað mér að margir unglæknar fái að heyra að fólk vilji tala við alvörulækni, það getur ekki verið skemmtilegt! En líklegast er þetta bara hluti af lífinu og starfsþróuninni. Bara bíta í það súra og láta það ekki á sig fá..hehe...jámm...

En skemmtilegt var þetta!

Annað í fréttum...var að klára 5 vikna verknámið mitt í gær - seinasta verknámstörnin í hjúkrunarnáminu! Nú verður allur kraftur lagður í verknámið og vinnuna, og ýmislegt fleira sem ég ætla mér að rækta eins og familíuna og vini, ítölskunámið (! já, var að byrja í ítölsku), kórinn og framtíðarplön !!!

3 upphrópunarmerki, og ekki einu einasta ofaukið. Það er nefnilega hausverkur út af fyrir sig því ég er eins og lauf í vindi með að taka einhverja ákvörðun. Ég er að hugsa um að sækja bara um vinnu og nám hér og þar og sjá hvað ég fæ - taka svo ákvörðun þegar þar að kemur, hvernig hljómar það? Ég ætla ekki að tala of mikið um möguleikana sem koma til greina því hver veit nema þeir verði allir foknir í veður og vind og nýir teknir við í kollinum á mér í vor!

Hafið það gott mín kæru :)